गेल्या अनेक वर्षापासून म्हाडा लॉटरीतील हजारो घरे विक्रीविना तशीच पडून आहेत. अशा विक्री अभावी पडून असलेल्या घरांच्या किमतींचा आढावा घेऊन निर्णय घेणार असल्याची माहिती सरकारने दिली आहे.
अनेक वर्षापासून बांधून तयार असलेली व विक्रीविना पडून असलेली घरे स्वस्त होणार आहेत. म्हाडाच्या सरसकट घरांच्या नव्हे तर म्हाडा लॉटरीतील अनेक वर्षापासून पडून असलेल्या घरांच्याच किमती कमी होणार असल्याचं अतुल सावे यांनी यावेळी बोलताना स्पष्ट केलं आहे. विक्री अभावी पडून असलेल्या घरांच्या किंमतीचा आढावा घेणार असून या घरांच्या किंमती कमी करून पुनर्विक्री करणार असल्याचंही यावेळी मंत्री अतुल सावे यांनी सांगितलं.
म्हाडाच्या सुमारे ११ हजार घरांच्या किंमती कमी होणार आहेत. संबंधित घरांचं वीज बिल, पाणी पट्टी भरावी लागत असल्यानं म्हाडाच्या वतीनं हा निर्णय घेण्यात आल्याचंही यावेळी मंत्री सावे यांनी सांगितलं आहे. संबंधित घरांचं वीज बिल, पाणी पट्टी यामध्ये म्हाडाचा बराच पैसा खर्च होतो. अशा तब्बल ११ हजार घरांची कमी किमती करुन पुन्हा विक्री करून नुकसान टाळत महसूल वाढीसाठी हा निर्णय घेण्यात आल्याचं गृहनिर्माण मंत्री अतुल सावे यांनी सांगितलं.
