मुंबई : उद्धव ठाकरे यांची काल खेडमध्ये जाहीर सभा पार पडली. या सभेत बोलताना माजी मुख्यमंत्री उद्धव ठाकरेंनी भाजप आणि शिवसेना (शिंदे गट) यांच्यावर निशाणा साधला. सगळं चोराल पण शिवसेना चोरू शकणार नाही, असं म्हणत उद्धव ठाकरेंनी एकनाथ शिंदेंवर घणाघाती टीका केली. तसेच, भाजपलाही फैलावर घेतलं. यावर बोलताना उपमुख्यमंत्री देवेंद्र फडणवीसांनी आम्ही हेरलं म्हणून त्यांना चोरलं, असं म्हणत उद्धव ठाकरेंना प्रत्युत्तर दिलं आहे. तसेच, नाकाखालून 40 जण निघून घेल्याची निराशा सभेत दिसल्याची टीकाही फडणवीसांना केली आहे.
उद्धव ठाकरे यांची काल (5 मार्च) खेड येथे जाहीर सभा घेण्यात आली. त्या सभेत भाजपवरील टीकेला उत्तर देताना देवेंद्र फडणवीस यांनी ठाकरेंवर जोरदार टीका केली. ते म्हणाले की, "तेच शब्द, तिच वाक्य, तेच टोमणे या व्यतिरिक्त काहीही नवीन यांच्याकडे नाही, खरं म्हणजे त्यांच्या नाकाखालून 40 लोक निघून गेल्याचा संताप आणि निराशा तसेच त्यांच्या भाषणात हताशपणाही दिसून येत होता. त्यामुळे अशा हताश भाषणावर आणि टोमण्यांवर काहीही प्रतिक्रिया देणं मला योग्य वाटत नाही, अशी प्रतिक्रिया फडणवीस यांनी दिली आहे.
केंद्रीय मंत्री कपिल पाटील यांना वाढदिवसाच्या शुभेच्छा देण्यासाठी उपमुख्यमंत्री देवेंद्र फडणवीस भिवंडीत आले असून यावेळी केंद्रीय मंत्री कपिल पाटील चषकचे भव्य आयोजन करण्यात आले होते. कपिल पाटील यांच्या वाढदिवसानिमित्त मोदी सरकारच्या 'हर घर जल, हर घर नल' या योजनेचा केक तयार करण्यात आला होता. हा केक कापून मंत्री कपिल पाटील यांना शुभेच्छा देण्यात आल्या त्यानंतर उपमुख्यमंत्री देवेंद्र फडणवीस यांनी मैदानात केंद्रीय मंत्री कपिल पाटील यांच्या गोलंदाजीवर भन्नाट अशी फलंदाजी केली तर दुसरीकडे केकवर बच्चेकंपनीनं ताव मारला .
दरम्यान, उपमुख्यमंत्री देवेंद्र फडणवीस कपिल पाटील यांना शुभेच्छा देत म्हणाले की, लोकोपयोगी काम करणारा नेता म्हणून कपिल पाटील यांच्याकडे पाहिलं जातं. आर. आर. पाटील जे कपिल पाटील यांच्या विषयी बोलले तेच आम्ही हेरलं आणि कपिल पाटील यांना त्यांच्याकडून चोरलं होतं, असं फडणवीस म्हणाले
